વાઇબ્રન્ટ ગુજરાત રીજનલ કોન્ફરન્સ (VGRC) અંતર્ગત સૌરાષ્ટ્ર–કચ્છ વિસ્તારમાં બ્લુ ઇકોનોમીને નવી દિશા અને ગતિ આપવાની ગુજરાત સરકારની દ્રઢ પ્રતિબદ્ધતા ફરી એકવાર સ્પષ્ટ બની છે. કચ્છના દરિયાકિનારે બ્લુ ઇકોનોમીનું શક્તિશાળી કેન્દ્ર વિકસાવવા માટે બંદરો, જેટી અને હાર્બરની સુવિધાઓને મજબૂત બનાવવામાં આવી રહી છે. ખાસ કરીને ₹121 કરોડના ખર્ચે આધુનિક અને સુસજ્જ જેટી તથા હાર્બરનું નિર્માણ કરવામાં આવશે, જે દરિયાઈ વ્યવસાય, માછીમારી અને સમુદ્રી ઉદ્યોગોને વેગ આપશે.

VGRC દરમિયાન કચ્છ–સૌરાષ્ટ્ર વિસ્તારમાં સિદ્ધ થયેલી સિદ્ધિઓને વૈશ્વિક સ્તરે પ્રદર્શિત કરવાનો મહત્વપૂર્ણ નિર્ણય લેવાયો છે. ખાસ કરીને કચ્છ–સૌરાષ્ટ્રના સમુદ્રી શેવાળ (Seaweed) ખેતી ક્ષેત્રે થયેલી પ્રગતિ વૈશ્વિક સ્તરે આકર્ષણનું કેન્દ્ર બની છે. કચ્છના કોરી ક્રીક વિસ્તારમાં CMFRI, CSMCRI તેમજ ખાનગી ઉદ્યોગ સાહસિકોના સહયોગથી ગ્રાસિલેરિયા (Gracilaria) જાતિના સમુદ્રી શેવાળનું સફળતાપૂર્વક સંવર્ધન કરવામાં આવી રહ્યું છે.

ગુજરાત સરકારે દરિયાકાંઠા વિસ્તારોમાં, ખાસ કરીને કચ્છ અને સૌરાષ્ટ્રમાં, સીવીડ ફાર્મિંગ દ્વારા ‘બ્લુ રેવોલ્યુશન’ની શરૂઆત કરી છે. આ પહેલ માત્ર રાજ્ય માટે નહીં પરંતુ સમગ્ર દેશની બ્લુ ઇકોનોમીને મજબૂત બનાવવામાં મહત્વની ભૂમિકા ભજવશે. સમુદ્રી શેવાળ ખેતીથી દરિયાઈ સમુદાયો માટે આવકના નવા સ્ત્રોત ઊભા થશે, રોજગારીની તકો વધશે અને દરિયાકાંઠાના વિસ્તારોમાં આર્થિક સમૃદ્ધિ આવશે.

સરકારના માર્ગદર્શન અને વૈજ્ઞાનિક સંસ્થાઓના સહયોગથી સીવીડ ફાર્મિંગ એક પર્યાવરણમૈત્રી અને ટકાઉ વ્યવસાય તરીકે વિકસી રહ્યું છે. આ ક્ષેત્રમાં ફૂડ પ્રોસેસિંગ, ફાર્માસ્યુટિકલ્સ, કોસ્મેટિક્સ અને બાયોફ્યુઅલ જેવા અનેક ઉદ્યોગોની સંભાવનાઓ છે.

વાઇબ્રન્ટ ગુજરાત રીજનલ કોન્ફરન્સ દ્વારા સૌરાષ્ટ્ર–કચ્છની દરિયાઈ ક્ષમતાઓને વૈશ્વિક સ્તરે ઓળખ અપાવવાનો પ્રયાસ કરવામાં આવી રહ્યો છે. બ્લુ ઇકોનોમી, બંદર વિકાસ અને સીવીડ ખેતી જેવી પહેલોથી કચ્છનો દરિયાકિનારો આગામી સમયમાં વિકાસ અને સમૃદ્ધિનું પાવરહાઉસ બનશે, તેવું સ્પષ્ટ સંકેત મળી રહ્યું છે.