આત્મનિર્ભર ગુજરાતની દિશામાં રાજ્ય સરકાર દ્વારા કુશળતા વિકાસને પ્રોત્સાહન આપવા સતત પ્રયત્નો કરવામાં આવી રહ્યા છે. આ દિશામાં સ્ટોન આર્ટિઝન પાર્ક ટ્રેનિંગ ઇન્સ્ટિટ્યૂટ (SAPTI) દ્વારા પથ્થરકલા અને શિલ્પકલા ક્ષેત્રે નોંધપાત્ર પ્રગતિ થઈ છે. ડિસેમ્બર ૨૦૨૫ સુધીમાં SAPTI દ્વારા કુલ ૬૭૪ ઉમેદવારોને સફળતાપૂર્વક તાલીમ આપી ગ્રેજ્યુએટ કરવામાં આવ્યા છે, જે રાજ્યમાં શિલ્પકલા ક્ષેત્રના કુશળ માનવસંસાધનને મજબૂત બનાવે છે.

SAPTIનું મુખ્ય ઉદ્દેશ્ય ગુજરાતની પરંપરાગત પથ્થરકલા અને શિલ્પકલા વારસાને જાળવી રાખીને યુવાનોને રોજગારલક્ષી કુશળતાઓથી સજ્જ બનાવવાનું છે. આ તાલીમ કાર્યક્રમો દ્વારા યુવાનોમાં સ્વરોજગારની ભાવના વિકસે છે અને તેઓમાં આત્મવિશ્વાસ તથા આત્મસન્માન વધે છે.

આ દિશામાં રાજ્યમાં બનાસકાંઠાના આંબાજી અને સુરેન્દ્રનગરના ધ્રાંગધ્રા ખાતે બે નવા આર્ટિઝન પાર્કની સ્થાપના કરવામાં આવી છે. આ પાર્કો દ્વારા પથ્થરકલા સાથે સંકળાયેલા કલાકારોને આધુનિક માળખું, તાલીમ, સાધનો અને બજાર જોડાણની સુવિધા પૂરી પાડવામાં આવી રહી છે. આ પ્રયાસો ગુજરાતની અમૂલ્ય શિલ્પકલા પરંપરાને જીવંત રાખવામાં મહત્વપૂર્ણ ભૂમિકા ભજવી રહ્યા છે.

SAPTIની ખાસિયત એ છે કે અહીં પરંપરાગત શિલ્પકલા પદ્ધતિઓને આધુનિક સાધનો, નવી ટેક્નોલોજી અને વૈશ્વિક ડિઝાઇન સાથે સંકલિત કરવામાં આવે છે. પરિણામે તૈયાર થતી શિલ્પકૃતિઓ આજના આધુનિક બજારની માંગને અનુરૂપ બની રહી છે. આ અભિગમથી સ્થાનિક કળાને વૈશ્વિક સ્તરે ઓળખ મળી રહી છે.

શિલ્પકલા ક્ષેત્રે SAPTI દ્વારા કરવામાં આવતી પહેલ માત્ર તાલીમ પૂરતી મર્યાદિત નથી, પરંતુ તે એક સમગ્ર ઇકોસિસ્ટમ તૈયાર કરે છે, જેમાં તાલીમ, ઉત્પાદન, ડિઝાઇન, માર્કેટિંગ અને રોજગારના અવસરો સામેલ છે. આ રીતે SAPTI ગુજરાતમાં કુશળતાવિકાસ, વારસા સંરક્ષણ અને આત્મનિર્ભરતાને એકસાથે આગળ ધપાવતું મહત્વપૂર્ણ મોડેલ બની રહ્યું છે.