111-ઉમરેઠ વિધાનસભા પેટા ચૂંટણી 2026ને પારદર્શક અને નિષ્પક્ષ બનાવવા માટે ચૂંટણી તંત્ર દ્વારા વિવિધ સ્તરે સઘન તૈયારીઓ હાથ ધરવામાં આવી રહી છે. આ સંદર્ભમાં ખર્ચ ઓબ્ઝર્વર શ્રી અનંગ રાવતે આણંદ ખાતે કાર્યરત જિલ્લા કક્ષાના ફરીયાદ નિવારણ કેન્દ્ર તેમજ મીડિયા મોનીટરીંગ સેન્ટરની મુલાકાત લઈને કામગીરીની સમીક્ષા કરી હતી.

આ મુલાકાત દરમિયાન શ્રી રાવતે બંને કેન્દ્રોની વ્યવસ્થાઓ, કામગીરીની પદ્ધતિ તેમજ તકેદારી અંગે વિસ્તૃત માહિતી મેળવી હતી. ફરીયાદ નિવારણ કેન્દ્રમાં મતદારો તેમજ રાજકીય પક્ષો દ્વારા કરવામાં આવતી રજૂઆતોને ઝડપથી અને પારદર્શક રીતે ઉકેલવા માટે કરવામાં આવેલી વ્યવસ્થાઓ અંગે તેમણે સંતોષ વ્યક્ત કર્યો હતો. તેમણે અધિકારીઓને સૂચના આપી હતી કે કોઈપણ ફરિયાદને પ્રાથમિકતા આધારે લઈ તેનું સમયસર નિરાકરણ લાવવામાં આવે.

મીડિયા મોનીટરીંગ સેન્ટરની મુલાકાત દરમિયાન તેમણે પ્રિન્ટ, ઇલેક્ટ્રોનિક અને સોશિયલ મીડિયા પર નજર રાખવાની પ્રક્રિયા અંગે માહિતી મેળવી હતી. ચૂંટણી ખર્ચની મર્યાદાનું પાલન થાય તે માટે ઉમેદવારો દ્વારા કરવામાં આવતી જાહેરાતો અને પ્રચાર પર ખાસ નજર રાખવામાં આવી રહી છે. તેમણે મીડિયા મોનીટરીંગ ટીમને સૂચના આપી હતી કે કોઈપણ શંકાસ્પદ અથવા અનિયમિત ખર્ચની નોંધ તાત્કાલિક લેવામાં આવે અને જરૂરી કાર્યવાહી કરવામાં આવે.

આ અવસરે જિલ્લા ચૂંટણી તંત્રના અધિકારીઓએ ચૂંટણી પ્રક્રિયા પારદર્શક અને કાયદેસરની રીતે પાર પડે તે માટે કરવામાં આવેલી તૈયારીઓ અંગે વિગતવાર પ્રસ્તુતિ આપી હતી. શ્રી રાવતે સમગ્ર ટીમની કામગીરીની પ્રશંસા કરી અને જણાવ્યું કે નિષ્પક્ષ ચૂંટણી માટે આવી મોનીટરીંગ વ્યવસ્થાઓ ખૂબ જ મહત્વપૂર્ણ છે.

ચૂંટણી દરમિયાન મતદારોને નિર્ભય અને નિષ્પક્ષ રીતે મતદાન કરી શકે તે માટે તંત્ર પ્રતિબદ્ધ છે. આવનારા દિવસોમાં પણ આવી સમીક્ષા મુલાકાતો દ્વારા ચૂંટણી પ્રક્રિયા પર સતત નજર રાખવામાં આવશે અને કોઈપણ પ્રકારની ગેરરીતિને અટકાવવા માટે કડક પગલાં લેવામાં આવશે.