ડાંગ જિલ્લામાં આવનારી સ્થાનિક સ્વરાજ્યની ચૂંટણીઓ-2026ને ધ્યાનમાં રાખીને સમગ્ર જિલ્લા વહીવટી તંત્ર સંપૂર્ણ સજ્જ બની ગયું છે. એપ્રિલ 2026 દરમિયાન યોજાનારી જિલ્લા પંચાયત અને તાલુકા પંચાયતની ચૂંટણીઓ નિષ્પક્ષ, પારદર્શક અને શાંતિપૂર્ણ વાતાવરણમાં યોજાય તે માટે જરૂરી તમામ તૈયારીઓ તેજ ગતિએ આગળ વધી રહી છે. ચૂંટણીનો શંખનાદ થતાની સાથે જ જિલ્લામાં આદર્શ આચારસંહિતાનો અમલ શરૂ કરી દેવામાં આવ્યો છે.

આ સંદર્ભે આજે જિલ્લા કલેક્ટર સુશ્રી શાલિની દુહાનના અધ્યક્ષસ્થાને નોડલ અધિકારીઓ સાથે મહત્વપૂર્ણ સમીક્ષા બેઠક યોજાઈ હતી. બેઠક દરમિયાન વિવિધ મુદ્દાઓ પર વિસ્તૃત ચર્ચા કરવામાં આવી અને અધિકારીઓને જરૂરી માર્ગદર્શન આપવામાં આવ્યું હતું. જિલ્લા કલેક્ટરે ખાસ કરીને આદર્શ આચારસંહિતાના કડક પાલન પર ભાર મૂક્યો હતો, જેથી ચૂંટણી પ્રક્રિયા દરમિયાન કોઈપણ પ્રકારની અનિયમિતતા ન થાય.

ચૂંટણી પ્રક્રિયાને સરળ અને સુચારુ બનાવવા માટે EVM મશીનોના વ્યવસ્થાપન તેમજ તેમના સુરક્ષિત પરિવહન માટે વિશેષ આયોજન કરવામાં આવ્યું છે. સાથે જ SVEEP કાર્યક્રમ અંતર્ગત મતદારોમાં જાગૃતિ ફેલાવવા માટે વિવિધ પ્રવૃત્તિઓ યોજવામાં આવશે, જેથી વધુમાં વધુ મતદારો પોતાના મતાધિકારનો ઉપયોગ કરે.

ફરિયાદોની ઝડપી અને પારદર્શક રીતે નોંધણી અને નિવારણ માટે હેલ્પલાઇન સુવિધા પણ ઉપલબ્ધ કરાવવામાં આવી છે. આ સાથે સ્થળાંતરિત મતદારોને પણ મતદાનમાં સરળતા રહે તે માટે ખાસ વ્યવસ્થાઓ ઉભી કરવામાં આવી રહી છે.

જિલ્લા વહીવટી તંત્રએ તમામ નાગરિકોને અપીલ કરી છે કે તેઓ લોકશાહીના આ મહોત્સવમાં સક્રિય ભાગ લે અને આદર્શ આચારસંહિતાનું પાલન કરીને ચૂંટણીને સફળ બનાવે. ડાંગ જિલ્લામાં યોજાનારી આ ચૂંટણી પારદર્શિતા અને વિશ્વાસનું ઉત્તમ ઉદાહરણ બની રહે તે માટે તમામ તંત્રો સંકલિત રીતે કાર્યરત છે.