ભાવનગર ખાતે જિલ્લા કલેક્ટરશ્રી ડૉ. મનીષ કુમાર બંસલના અધ્યક્ષસ્થાને રોડ સેફ્ટી કાઉન્સિલની મહત્વપૂર્ણ બેઠક યોજાઈ હતી. આ બેઠકમાં જિલ્લામાં માર્ગ સલામતી મજબૂત બનાવવા તથા અકસ્માતોની સંખ્યા ઘટાડવા માટે વિવિધ મુદ્દાઓ પર વિસ્તૃત ચર્ચા કરવામાં આવી હતી.

જિલ્લા કલેક્ટરશ્રીએ ખાસ કરીને રોગ સાઈડમાં વાહન ચલાવનારાઓ સામે તાત્કાલિક અને કડક કાર્યવાહી કરવા માટે સંબંધિત અધિકારીઓને સ્પષ્ટ નિર્દેશ આપ્યો હતો. તેમણે જણાવ્યું હતું કે રોગ સાઈડ ડ્રાઇવિંગના કારણે અનેક ગંભીર અકસ્માતો સર્જાઈ રહ્યા છે, જેને રોકવા માટે સઘન ચેકિંગ અભિયાન ચલાવવું અત્યંત જરૂરી છે. ટ્રાફિક નિયમોનું કડક પાલન સુનિશ્ચિત કરવા માટે પોલીસ વિભાગને વધુ સતર્ક રહેવા પણ સૂચના આપવામાં આવી હતી.

બેઠક દરમિયાન શહેર અને જિલ્લાના મુખ્ય માર્ગો પર ટ્રાફિક વ્યવસ્થાને વધુ સુગમ બનાવવા માટે પગલાં લેવા અંગે ચર્ચા કરવામાં આવી હતી. ખાસ કરીને વ્યસ્ત ચોરાહાઓ પર સિગ્નલ સિસ્ટમ મજબૂત બનાવવી, માર્ગચિહ્નો સ્પષ્ટ રાખવા તથા અકસ્માતપ્રવણ વિસ્તારોમાં જરૂરી સુધારાઓ કરવા પર ભાર મુકાયો હતો. ઉપરાંત, હેલ્મેટ અને સીટબેલ્ટના નિયમોનું પાલન કરાવવા માટે જાગૃતિ અભિયાન વધુ અસરકારક બનાવવા સૂચના આપવામાં આવી હતી.

જિલ્લા કલેક્ટરશ્રીએ શાળા અને કોલેજોમાં માર્ગ સલામતી અંગે જાગૃતિ ફેલાવવા માટે વિશેષ કાર્યક્રમો યોજવા પર પણ ભાર મુક્યો હતો. યુવાનોમાં ટ્રાફિક નિયમો પ્રત્યે જવાબદારીની ભાવના વિકસે તે માટે શિક્ષણ સંસ્થાઓ સાથે સંકલન કરીને કામગીરી કરવાની જરૂરિયાત વ્યક્ત કરી હતી.

આ બેઠકમાં પોલીસ વિભાગ, આરટીઓ, નગરપાલિકા તથા અન્ય સંબંધિત વિભાગોના અધિકારીઓ હાજર રહ્યા હતા અને તમામે પોતાના વિભાગ દ્વારા હાથ ધરવામાં આવેલી કામગીરી અંગે વિગતવાર માહિતી આપી હતી.

અંતમાં જિલ્લા કલેક્ટરશ્રીએ તમામ વિભાગોને સંકલન સાથે કાર્ય કરીને ભાવનગર જિલ્લામાં માર્ગ સલામતીનું મજબૂત માળખું ઊભું કરવા અપીલ કરી હતી.