Devbhoomi Dwarka district જિલ્લા મહિલા અને બાળ અધિકારી કચેરી દ્વારા Dr. R.N. Varotriya Women Arts and Commerce College, જામ ખંભાળિયા ખાતે “Sexual Harassment of Women at Workplace (Prevention, Prohibition and Redressal) Act-2013” અંગે જાગૃતિ અને માર્ગદર્શન કાર્યક્રમનું આયોજન કરવામાં આવ્યું હતું. કાર્યક્રમનો હેતુ મહિલાઓને કાર્યસ્થળે સુરક્ષા, કાનૂની હકો અને સહાય વ્યવસ્થાઓ અંગે માહિતગાર કરવાનો હતો.

કાર્યક્રમમાં જિલ્લા મહિલા અને બાળ અધિકારી ડૉ. ચંદ્રેશકુમાર ભાંભીએ આજના ટેક્નોલોજી યુગમાં AI જેવા માધ્યમ દ્વારા ફેલાતી ગેરવર્તણૂક અને સાયબર હેરાસમેન્ટ અંગે વિસ્તૃત માર્ગદર્શન આપ્યું. તેમણે કાર્યસ્થળે થતા યૌન ઉત્પીડનના વિવિધ સ્વરૂપો, તેના કાનૂની પરિણામો અને ફરિયાદ પ્રક્રિયા અંગે સ્પષ્ટ સમજ આપી. તેમણે ભારપૂર્વક જણાવ્યું કે મહિલાઓએ પોતાના હકો અંગે જાગૃત રહેવું અને કોઈ પણ પ્રકારની અણગમતી ઘટના સામે અવાજ ઉઠાવવો જરૂરી છે.

જિલ્લા કાનૂની સેવા સત્તા મંડળની વકીલ ગોપીબેન મુંદ્રાએ કાયદાની વિવિધ જોગવાઈઓ, ફરિયાદ નોંધાવવાની પ્રક્રિયા તેમજ મહિલાઓને મળતી નિ:શુલ્ક કાનૂની સહાય વિશે માહિતી આપી. દહેજ પ્રતિબંધ અને સહ-રક્ષણ અધિકારી પ્રફુલ પી. જાડવએ દહેજ પ્રતિબંધ અધિનિયમ અને ગૃહ હિંસા અધિનિયમ હેઠળ મળતી સહાય તથા કાનૂની રક્ષણ અંગે સમજાવી મહિલાઓને સશક્ત બનવા પ્રેરિત કર્યા.

જિલ્લા હબ ફોર એમ્પાવરમેન્ટ ઓફ વુમનના જિલ્લા સંયોજક દિવ્યાબેન બારડે મહિલા અને બાળ વિકાસ વિભાગની વિવિધ યોજનાઓ જેવી કે સખી વન સ્ટોપ સેન્ટર, મહિલા હેલ્પ સેન્ટર, 181 મહિલા હેલ્પલાઇન, ગંગાસ્વરૂપા આર્થિક સહાય યોજના અને વ્હાલી દીકરી યોજના અંગે માહિતી આપી.

આ સેમિનારમાં જિલ્લા મહિલા અને બાળ અધિકારી કચેરી હેઠળ ચાલતા વિવિધ પ્રોજેક્ટના કર્મચારીઓ, કોલેજના પ્રોફેસરો અને મોટી સંખ્યામાં વિદ્યાર્થીનીઓ હાજર રહ્યા હતા. કાર્યક્રમથી મહિલાઓમાં કાનૂની જાગૃતિ અને સુરક્ષિત કાર્યસ્થળ માટેનો વિશ્વાસ વધ્યો છે.