અત્યંત કઠિન અને પડકારજનક ગણાતી અખિલ ભારત ગિરનાર આરોહણ-અવરોહણ સ્પર્ધા દરમિયાન સ્પર્ધકોની સુરક્ષા અને આરોગ્ય માટે વિશેષ વ્યવસ્થા ગોઠવવામાં આવી હતી. યુવક સેવા અને સાંસ્કૃતિક પ્રવૃત્તિઓ વિભાગ તેમજ જૂનાગઢ જિલ્લા વહીવટી તંત્ર દ્વારા આયોજિત આ સ્પર્ધામાં મેડિકલ સુવિધાઓને પ્રાથમિકતા આપવામાં આવી હતી.

સ્પર્ધા દરમિયાન ગિરનાર પર્વતના વિવિધ ચરણો અને ચેક પોઈન્ટ્સ પર મેડિકલ કોલેજના અનુભવી તબીબો, પેરામેડિકલ સ્ટાફ તથા એમ્બ્યુલન્સ સેવાઓ તૈનાત રાખવામાં આવી હતી. કોઈપણ પ્રકારની ઈમરજન્સી સ્થિતિમાં તાત્કાલિક સારવાર મળી રહે તે માટે સતત મોનિટરિંગ કરવામાં આવ્યું હતું.

આ ઉપરાંત જિલ્લા વ્યાયામ મંડળના શિક્ષકો, રમતગમત વિભાગના કર્મચારીઓ તેમજ વિવિધ સેવાભાવી સંસ્થાઓ દ્વારા સ્પર્ધકોને માર્ગદર્શન, પાણી, પ્રાથમિક સારવાર અને જરૂરી સહાય પૂરી પાડવામાં આવી હતી. સમગ્ર સ્પર્ધા દરમિયાન સ્વયંસેવકો દ્વારા સંકલન સાથે કામગીરી કરવામાં આવી હતી.

આયોજકો દ્વારા જણાવવામાં આવ્યું હતું કે, ગિરનાર જેવી કઠિન ભૂગોળ ધરાવતી જગ્યાએ સ્પર્ધા યોજાતી હોવાથી ખેલાડીઓની સલામતી માટે તમામ ધોરણોનું પાલન કરવામાં આવ્યું છે. ટેકનોલોજી આધારિત પરિણામ વ્યવસ્થા સાથે સાથે સુરક્ષા વ્યવસ્થાઓએ પણ સ્પર્ધાની વિશ્વસનીયતા અને સફળતામાં મહત્વપૂર્ણ ભૂમિકા ભજવી હતી.

સ્પર્ધકો દ્વારા પણ આયોજન, સુરક્ષા અને વ્યવસ્થાપન અંગે સંતોષ વ્યક્ત કરવામાં આવ્યો હતો. રાજ્ય સરકાર અને જિલ્લા વહીવટી તંત્રના સંયુક્ત પ્રયાસોથી ગિરનાર આરોહણ-અવરોહણ સ્પર્ધા એક આદર્શ અને સફળ રમતોત્સવ બની હોવાનું ઉપસ્થિતોએ જણાવ્યું હતું.