ઇન્ડિયન મેડિકલ એસોસિએશન (ગુજરાત પ્રદેશ) દ્વારા આયોજિત 100મું ઓલ ઈન્ડિયા મેડિકલ કોન્ફરન્સ – IMA NATCON 2025નું ભવ્ય આયોજન કરવામાં આવ્યું હતું. આ પ્રસંગે ઇન્ડિયન મેડિકલ એસોસિએશનની શપથવિધિ પણ યોજાઈ હતી. કાર્યક્રમમાં કેન્દ્રીય ગૃહ તથા સહકાર મંત્રી શ્રી અમિતભાઈ શાહની અધ્યક્ષતામાં મુખ્યમંત્રી શ્રી ભૂપેન્દ્રભાઈ પટેલ, IMAના પદાધિકારીઓ, દેશ-વિદેશમાંથી આવેલા તબીબો, આરોગ્ય નિષ્ણાતો અને નીતિ ક્ષેત્રના પ્રતિનિધિઓ વિશેષ ઉપસ્થિત રહ્યા હતા.

આ અવસરે IMA દ્વારા તૈયાર કરાયેલ મહત્વપૂર્ણ પુસ્તક ‘100 સ્ટેપ્સ હેલ્થ’નું વિમોચન કરવામાં આવ્યું હતું. કેન્દ્રીય ગૃહ તથા સહકાર મંત્રી સહિત અન્ય મહાનુભાવોના સહયોગથી આ પુસ્તકનું લોકાર્પણ કરવામાં આવ્યું. પુસ્તકમાં જન આરોગ્ય સુધારણા, જીવનશૈલીમાં સ્વસ્થ અભિગમ અને રોગનિવારણ માટેના વ્યવહારુ માર્ગદર્શનનો સમાવેશ કરવામાં આવ્યો છે.

કાર્યક્રમને સંબોધતા કેન્દ્રીય ગૃહ તથા સહકાર મંત્રી શ્રી અમિતભાઈ શાહે જણાવ્યું હતું કે દેશભરમાં સર્વાંગી દૃષ્ટિકોણ સાથે મજબૂત હેલ્થ ઇકોસિસ્ટમનું નિર્માણ થઈ રહ્યું છે. પ્રાથમિક આરોગ્યથી લઈને સુપર સ્પેશિયાલિટી સેવાઓ સુધી આરોગ્ય ક્ષેત્રને એક સુવ્યવસ્થિત માળખું આપવામાં આવી રહ્યું છે, જેનાથી સામાન્ય નાગરિકોને ગુણવત્તાયુક્ત આરોગ્ય સેવાઓ ઉપલબ્ધ બની રહી છે.

મુખ્યમંત્રી શ્રી ભૂપેન્દ્રભાઈ પટેલે પોતાના સંબોધનમાં જણાવ્યું હતું કે પ્રધાનમંત્રી શ્રી નરેન્દ્રભાઈ મોદીના નેતૃત્વ હેઠળ આરોગ્ય સેવાઓમાં ઐતિહાસિક પરિવર્તન આવ્યું છે. આરોગ્ય ક્ષેત્રે આધુનિક ઇન્ફ્રાસ્ટ્રક્ચર, નવીનતમ ટેકનોલોજી, ડિજિટલ હેલ્થ સુવિધાઓ અને અદ્યતન સારવાર પદ્ધતિઓનો વ્યાપક વિકાસ થયો છે. રાજ્ય અને દેશ બંને સ્તરે આરોગ્ય સેવાઓ વધુ સક્ષમ, સુલભ અને દર્દીકેન્દ્રિત બની છે.

IMA NATCON 2025 દ્વારા તબીબી ક્ષેત્રના વ્યાવસાયિકોને જ્ઞાન વિનિમય, નીતિ ચર્ચા અને ભવિષ્યની આરોગ્ય પડકારો અંગે વિચારવિમર્શ માટે મહત્વપૂર્ણ મંચ મળ્યો છે. આ કોન્ફરન્સ આરોગ્ય ક્ષેત્રે નવી દિશા અને જનહિતકારી પ્રયાસોને વધુ મજબૂતી આપશે.