પૂર્વ વડાપ્રધાન અને ‘ભારત રત્ન’ શ્રી અટલ બિહારી વાજપેયીજીની જન્મજયંતી નિમિત્તે સમગ્ર દેશમાં ઉજવાતા **‘સુશાસન દિવસ’**ના અવસરે ગાંધીનગર ખાતે ગુડ ગવર્નન્સ ડેની ભવ્ય ઉજવણી કરવામાં આવી. આ કાર્યક્રમનું ઉદ્ઘાટન રાજ્યના મુખ્યમંત્રી શ્રી ભૂપેન્દ્રભાઈ પટેલના વરદ હસ્તે નાયબ મુખ્યમંત્રી શ્રી હર્ષભાઈ સંઘવી તેમજ રાજ્યના વરિષ્ઠ મંત્રીશ્રીઓની ઉપસ્થિતિમાં કરવામાં આવ્યું.

આ પ્રસંગે મુખ્યમંત્રીશ્રીએ નાગરિક કેન્દ્રિત પ્રશાસનને મજબૂત બનાવવા માટે શ્રેણીબદ્ધ પ્રકલ્પો, યોજનાઓ અને નીતિઓનું લૉન્ચિંગ કર્યું. તેમણે જણાવ્યું કે, માનનીય વડાપ્રધાન શ્રી નરેન્દ્રભાઈ મોદીના માર્ગદર્શન હેઠળ ગુજરાતમાં સુશાસન, પારદર્શિતા અને ટેકનોલોજી આધારિત સેવા વ્યવસ્થાને નવી દિશા મળી છે. અટલજીના વિચારોને સાકાર કરતી આ પહેલો રાજ્યને વધુ જવાબદાર અને કાર્યક્ષમ બનાવશે.

કાર્યક્રમ દરમિયાન AI આધારિત વિવિધ નાગરિક સેવાલક્ષી ડિજિટલ પહેલોનો પ્રારંભ કરવામાં આવ્યો. તેમાં સરકારના નિયમો, ઠરાવો અને પરિપત્રોને એક જ પ્લેટફોર્મ પર ઉપલબ્ધ કરાવતું ‘G-SAAR’ (Gujarat Smart AI Archive & Retrieval) પોર્ટલ ખાસ મહત્વનું છે, જેમાં 24 હજારથી વધુ દસ્તાવેજોની AI આધારિત ડિજિટલ રિપોઝિટરી ઉપલબ્ધ રહેશે.

આ સાથે સી.એમ. ફેલો મોનિટરિંગ પોર્ટલ, સ્વાગત ઓનલાઈનનું AI ઈન્ટિગ્રેશન, સી.એમ. ડેશબોર્ડ રિયલ ટાઈમ પરફોર્મન્સ મેઝરમેન્ટ સિસ્ટમ 2.0, તેમજ ડિજિટલ ગુજરાત WhatsApp ચેટબોટ અને સુરક્ષિત QR સેવાનો પણ આરંભ કરવામાં આવ્યો.

સરકારી કર્મચારીઓની ક્ષમતા વધારવા માટે મિશન કર્મયોગી પ્રશિક્ષણ અભિયાન, વિદેશસ્થ ગુજરાતીઓ માટે NRG વેબસાઈટ અને ‘અટલ સ્વાન્ત: સુખાય’ વેબ પોર્ટલનું લૉન્ચિંગ થયું. ઉપરાંત વિવિધ સંસ્થાઓ સાથે કેપેસિટી બિલ્ડિંગ અને એજ્યુકેશન રિસર્ચ માટેના MoU કરવામાં આવ્યા.

ઊર્જા ક્ષેત્રે આત્મનિર્ભરતા માટે પમ્પ્ડ હાઇડ્રોસ્ટોરેજ પોલિસી, ગ્રીન હાઈડ્રોજન પોલિસી અને ઈન્ટિગ્રેટેડ એનર્જી પોલિસીનું અનાવરણ કરાયું તેમજ બેસ્ટ પ્રેક્ટિસિસ સંગ્રહનું વિમોચન કરવામાં આવ્યું.

ગુડ ગવર્નન્સ ડેની આ ઉજવણી ગુજરાતને ટેકનોલોજી આધારિત, પારદર્શક અને નાગરિક હિતલક્ષી રાજ્ય બનાવવાની દિશામાં મહત્વપૂર્ણ પગલું સાબિત થઈ છે.