ગુજરાત રાજ્ય સરકારની સ્ટુડન્ટ સ્ટાર્ટઅપ એન્ડ ઇનોવેશન પોલિસી (SSIP) યુવાનોને સંશોધન અને નવીનતા માટે પ્રોત્સાહન આપી રહી છે. આ યોજનાના સહારે ભુજ એન્જિનિયરિંગ કોલેજના ઇલેક્ટ્રિકલ વિભાગના વિદ્યાર્થીઓ શક્તિસિંહ, નયનકુમાર, માનન, ચિરાગ અને સાહિલે એક અનોખું અને ઉપયોગી ઇનોવેશન વિકસાવ્યું છે. તેમણે ‘વેરિએબલ EV બેટરી ચાર્જર’ નામનું પ્રોટોટાઇપ તૈયાર કર્યું છે, જે વિવિધ વોલ્ટેજ ધરાવતી ઇલેક્ટ્રિક બે-વ્હીલર વાહનોની બેટરીને એક જ ચાર્જરથી ચાર્જ કરવાની ક્ષમતા ધરાવે છે.

હાલમાં ઇલેક્ટ્રિક વાહનોનો વપરાશ ઝડપથી વધી રહ્યો છે, પરંતુ અલગ-અલગ વોલ્ટેજ બેટરી માટે અલગ ચાર્જર ખરીદવાની ફરજ પડતી હોવાથી વપરાશકર્તાઓને મુશ્કેલી પડે છે. ભુજ એન્જિનિયરિંગ કોલેજના વિદ્યાર્થીઓના આ ઇનોવેશનથી આ સમસ્યાનો અસરકારક ઉકેલ મળી શકે છે. આ વેરિએબલ EV ચાર્જર વિવિધ વોલ્ટેજને ઓટોમેટિક રીતે ઓળખી તેની મુજબ ચાર્જિંગ પૂરું પાડે છે, જેના કારણે એક જ ચાર્જર તમામ પ્રકારની ઇલેક્ટ્રિક બે-વ્હીલર માટે ઉપયોગી બની શકે છે.

SSIP યોજનાથી મળેલી આર્થિક સહાય અને માર્ગદર્શનના કારણે વિદ્યાર્થીઓને સંશોધન, ડિઝાઇન અને પ્રોટોટાઇપ વિકાસ માટે જરૂરી સંસાધનો પ્રાપ્ત થયા. કોલેજના પ્રાધ્યાપકોના માર્ગદર્શન હેઠળ વિદ્યાર્થીઓએ પ્રેક્ટિકલ જ્ઞાનનો ઉપયોગ કરીને આ નવીન ચાર્જિંગ સિસ્ટમ તૈયાર કરી છે. આ પ્રોજેક્ટ માત્ર શૈક્ષણિક અભ્યાસ પૂરતો સીમિત નથી, પરંતુ ભવિષ્યમાં વ્યાપારી સ્તરે પણ ઉપયોગી બની શકે તેવો સંભાવનાશીલ છે.

વિદ્યાર્થીઓનું આ ઇનોવેશન ઇલેક્ટ્રિક વાહન ક્ષેત્રે ખર્ચ ઘટાડવા, ઇ-મોબિલિટી પ્રોત્સાહિત કરવા અને પર્યાવરણમૈત્રી ટેક્નોલોજીને આગળ વધારવામાં મહત્વપૂર્ણ સાબિત થશે. એક જ ચાર્જરથી વિવિધ બેટરી ચાર્જ કરવાની સુવિધાથી ગ્રાહકોને અલગ-અલગ ચાર્જર ખરીદવાની જરૂર રહેશે નહીં, જેના કારણે ખર્ચ અને ઈ-વેસ્ટમાં પણ ઘટાડો થશે.

રાજ્ય સરકારની SSIP યોજના યુવાનોના વિચારોને હકીકતમાં બદલવાનું મજબૂત માધ્યમ બની રહી છે. ભુજ એન્જિનિયરિંગ કોલેજના વિદ્યાર્થીઓનું આ ઇનોવેશન રાજ્યના યુવાનોની પ્રતિભા અને નવીનતાનું ઉત્તમ ઉદાહરણ છે અને અન્ય વિદ્યાર્થીઓને સંશોધન તથા સ્ટાર્ટઅપ તરફ પ્રેરણા આપશે.