માનનીય વડાપ્રધાન શ્રી નરેન્દ્રભાઈ મોદીના વરદહસ્તે રાજકોટ ખાતે આયોજિત કચ્છ–સૌરાષ્ટ્ર ઝોનની વાઇબ્રન્ટ ગુજરાત રિજનલ કૉન્ફરન્સ (VGRC)નો ભવ્ય અને ઐતિહાસિક શુભારંભ થયો. આ મહત્વપૂર્ણ પ્રસંગે ગુજરાતના મુખ્યમંત્રી શ્રી ભૂપેન્દ્રભાઈ પટેલ, નાયબ મુખ્યમંત્રી શ્રી હર્ષભાઈ સંઘવી, કેન્દ્ર તથા રાજ્ય સરકારના મંત્રીશ્રીઓ, દેશ-વિદેશના મહાનુભાવો તેમજ ઉદ્યોગજગતના અગ્રણી ઉદ્યોગપતિઓની વિશાળ ઉપસ્થિતિ રહી.

વડાપ્રધાનશ્રીએ આ અવસરે કચ્છ–સૌરાષ્ટ્રના ઔદ્યોગિક વિકાસને નવી ગતિ આપતી મોટી જાહેરાતો કરી. અમરેલી, ભાવનગર, જામનગર, કચ્છ, મોરબી, રાજકોટ અને સુરેન્દ્રનગર એમ કુલ 7 જિલ્લાઓમાં 3540 એકર વિસ્તારમાં ફેલાયેલા 13 નવા સ્માર્ટ ઇન્ડસ્ટ્રીયલ એસ્ટેટના નિર્માણની જાહેરાત કરવામાં આવી. આ ઇન્ડસ્ટ્રીયલ એસ્ટેટ્સ દ્વારા MSME, સ્ટાર્ટઅપ્સ અને મોટા ઉદ્યોગોને આધુનિક સુવિધાઓ સાથે વિકસવા માટે મજબૂત પ્લેટફોર્મ મળશે.

આ સાથે વડાપ્રધાન શ્રી નરેન્દ્ર મોદીએ રાજકોટના નાગલપુર ખાતે નિર્મિત અદ્યતન મેડિકલ ડિવાઈસ પાર્કનું લોકાર્પણ પણ કર્યું. આ મેડિકલ ડિવાઈસ પાર્કથી હેલ્થકેર ક્ષેત્રમાં આત્મનિર્ભર ભારતના સંકલ્પને બળ મળશે અને ઉચ્ચ ગુણવત્તાવાળા મેડિકલ ઉપકરણોના સ્થાનિક ઉત્પાદનને પ્રોત્સાહન મળશે. પરિણામે રોજગારીની નવી તકો સર્જાશે તેમજ આયાત પરની નિર્ભરતા ઘટશે.

વડાપ્રધાનશ્રીએ પોતાના સંબોધનમાં જણાવ્યું કે ભારત આજે ડેટા આધારિત ઇનોવેશન, આર્ટિફિશિયલ ઇન્ટેલિજન્સ (AI) રિસર્ચ અને સેમીકન્ડક્ટર મેન્યુફેક્ચરિંગનું વૈશ્વિક હબ બની રહ્યું છે. ગુજરાત સરકારની ઉદ્યોગમૈત્રી નીતિઓ અને મજબૂત ઇન્ફ્રાસ્ટ્રક્ચર કારણે રાજ્ય રોકાણકારો માટે પ્રથમ પસંદગી બની રહ્યું છે તેમ તેમણે ઉમેર્યું.

મુખ્યમંત્રી શ્રી ભૂપેન્દ્રભાઈ પટેલે જણાવ્યું કે વાઇબ્રન્ટ ગુજરાત રિજનલ કૉન્ફરન્સ રાજ્યના સંતુલિત અને સર્વાંગી વિકાસની દિશામાં મહત્વપૂર્ણ પગલું છે. આ કૉન્ફરન્સથી કચ્છ–સૌરાષ્ટ્ર ઝોનમાં ઉદ્યોગ, રોજગાર અને આર્થિક વિકાસને નવી ઉંચાઈ મળશે.

VGRC રાજકોટ આવૃત્તિએ ગુજરાતને વૈશ્વિક રોકાણ અને ઇનોવેશન હબ તરીકે વધુ મજબૂત બનાવવાની દિશામાં મહત્વપૂર્ણ માઈલસ્ટોન સાબિત થઈ છે.